An de Trappen staat een Hammermöhl, dormit hemm de Buurn dat Korn föör dat Veeh mahlt. Biet Trappengelänner is de Haferquetsche, de hemm Schölers van de Berufsschool weer in Gang brocht, da kann man uut Hafer nu weer Haferflocken mit mocken. Ook uns Elevator is dar weer, de geiht wieder naar boben. In de lange Jutesacken full de Stoff, de weert ut dat Korn blasen. Over de Offsacker is noch een Trieur, dor kunn man de verkeehrten Körners mit uut dat Korn ruutfinden, toon Biespiel dat giftige Mooderkorn. Un boben hangt een „Aspiration“ toon Schoonmaken van dat Korn un een „Sichter“ doormit hett man Mehl, Grieß un Kleie uutnanner kreegen. An de Deeken könen wie twee Mahlsteenen sehn, de Liggers, de liggen fast up de Balkens. Mit de Brüggbalken door unner kann de Müller de Afstand tüssen de Steenen instellen un doormit uutwählen, off dat fien off groff Mahlgoot weern sall. De Metallstang heet Möhliesen, de dracht de Looper boben oover de Ligger. Korn woord jümmers meermals döör mahlt un muss elke Maal weer naar boben, davöör hemm wie de tweede Elevator, de is unner de Trappen. De broch dat Korn weer naar boben to den Mahlgang. Dann hemm wie hier noch een richtige „highlight“. Bie de Sichter funn wie een Elektromotor mit Glöhbirn. Worum dat? Uns Elektriker hett dat dann ruutfunnen, dat is een Generator, de word mit Windkraft andreeven, so kunn de Müller sülfst Strom mocken un Geld spaarn. Mit de Flaschentoog künnt jie den swaren Sack naar boben tillen. Up disse Art hett man frauer de swaren Balken naar boben in de Möhlen tillt. Un jie könnt jau gern mit de Dezimalwaag wiegen. Foor elke Kilo Gewicht künnt ji tein Kilo up de Waag brengen!

…