De Schlachtmöhl is een tweestockige Galeriehollander mit Windrose. In de Möhl is noch de heele Technik to sehn, so as se bit in de 1960-er Jahren bruukt weerd, mit een Peldegang un Roggen- un Weet-Mahlgangen. Flögels un Kapp sünd 2004 nee maakt woorn un siet 2010 könen sick de Flögels ook weer dreien. 2013 sünd de Windrose un dat Reetdack repareert un de Fensters boben uutwesselt woorn. 2014 is de Möhlenhoff nee plastert woorn. 2015 hebb wie een Mahlgang weer in Gang brocht. Dat Müürwerk is mit Mosselkalk nee verfugt woorn. 2016 hebb wie dann een nee Galerie kregen und de Fensters und Dören unnern sind uutwesselt woorn.
Un so geiht dat wieder, so as dat Geld tosamen kummt: Uns Handwerkers hemm so naa und naa de Maschinen weer to Gang bracht un daar halpen de Schölers van de BBS Jever uns bie.
Nebenan in de Mühlenschüür kann man in dat Landwirtschaftsmuseum de Maschinen för de Weg van dat Korn van de Saat an bit too de Aarnt ankieken. Dann ist da ook noch een groote Schlosserwarkstee mit vööl Warktüüg too sehn. Unn een Potterswarkstee ut Jever is der ook noch, wor uns Potterin Potten, Beeekers un anner Keramik so als frauer mockt.

Wanneer wie open hemm

Jie könt van Sönndag vör Ostern (Kiewittmarkt) bit Mitte Oktober (Brüllmarkt) an Sönnabend un Sönndag nomiddags van 2 bit 5 mit een künnige Möhlenfründin of –fründ de Möhl ankieken. Nett so an Fierdagen un de Brückendagen darbie. Un in Juli un August hemm wie van Dingsdag bit Sönndag van 2 bit 5 open. In dat Landwirtschaftsmuseum nebenan hemms too de glieke Tieden open. Wenn jie too annere Tieden mit mehr Lüü tosammen komen willt, rööpt eben biet Schlossmuseum unner 04461-969350 an!

Möhl, Möllerhuus, Backhuus und Schüür hörn to de Zweckverband Schlossmuseum Jever. De Möhlenfründen van de Möhlenkring (Arbeitskreis Schlachtmühle im Jeverländischen Altertums- und Heimatverein) kümmern sück um de Möhl.